سحرة أم عباقرة تلاعب؟ 4 شخصيات حقيقية حيرت التاريخ بغموضها!

هل من الممكن أن ينجو إنسان من السم والرصاص والغرق في ليلة واحدة؟ وهل هناك لغة كاملة ظهرت من العدم وادعى صاحبها أنها لغة الملائكة؟ نحن لا نتحدث عن أساطير سينمائية، بل عن شخصيات حقيقية وثقها التاريخ بوقائع مرعبة وألغاز لم يجد لها العلم تفسيراً حتى الآن.. استعدوا لأننا سنغوص في الجانب المظلم من التاريخ.

بين الحقيقة والدجل.. عالم السحر المظلم:

السحر مش مجرد كلمات بتتقال أو حركات بالإيد زي ما بنشوف في الأفلام، السحر في جوهره هو السيطرة على العقول، على الأجساد، وحتى على مسار التاريخ نفسه. طول عمر البشرية وهي مرعوبة من الأشخاص اللي بيدعوا إنهم بيملكوا 'مفاتيح' مش مع حد غيرهم، الأشخاص اللي بيقدروا يهمسوا في ودان الملوك ويغيروا مصير أمم كاملة بكلمة واحدة.

الخطورة الحقيقية مكنتش بس في الطقوس الغريبة أو الكتب اللي مكتوبة بدم، الخطورة كانت في 'الكاريزما' اللي بتخلي العقل البشري يصدق المستحيل. إحنا النهاردة مش بنحكي عن سحرة السيرك، إحنا بنحكي عن ناس قدرت تخترق الواقع وتخلي العلم يقف قدامهم عاجز ومستغرب. ناس لعبوا بالنار، ومنهم اللي اتحرق بيها في الآخر، ومنهم اللي ساب لغزه عايش لحد اللحظة دي.. تعالوا نشوف مين هم الأشخاص اللي خلطوا السحر بالواقع لدرجة إننا مبقناش عارفين فين الحقيقة وفين الخيال!

أول شخصية معانا النهاردة هي الأخطر والأغرب في تاريخ روسيا كلها.. الشخص اللي الرصاص والسم وقفوا قدامه عاجزين! إحنا مش بنبدأ بأي حد، إحنا بنبدأ بالراجل الذي رفض الموت وقدر يسيطر على عقل إمبراطورة بكلمة واحدة.. الرهيب 'راسبوتين'

من هو راسبوتين ؟

جريجوري راسبوتين، روسي الجنسية، اتولد سنة 1869 في قرية "بوكروفسكوي" بسيبيريا.

بداية الخداع والسيطرة: بدأ حياته كفلاح أمّي، لكنه استغل "كاريزما" عينيه المرعبة وادعى الرهبنة. قدر يخدع العائلة الملكية بعد ما نجح في وقف نزيف ابن القيصر "أليكسي". سيطر على عقل الإمبراطورة "ألكسندرا" تماماً بعد ما أقنعها إن حياة ابنها مربوطة بوجوده هو شخصياً، ومن هنا بدأ يتدخل في تعيين الوزراء وعزلهم وبقى هو "الحاكم الفعلي" لروسيا.

لغز "نزيف الدم" (الخدعة الطبية) 🩸

أكبر حاجة ثبتت رجله في القصر هي علاج "أليكسي" ابن القيصر. راسبوتين كان بيعمل حاجتين:

التنويم الإيحائي: كان بيقعد جنب الطفل ويهمس في ودنه بكلام هادي جداً وبنبرة صوت عميقة، وده كان بيخلي الطفل يسترخي تماماً، وعلمياً لما التوتر بيقل، ضغط الدم بينخفض والنزيف بيقف.

منع الأطباء: كان بيأمرهم يوقفوا إعطاء الطفل "الأسبرين" (وقتها كان دواء جديد)، والأسبرين أصلاً بيزود سيولة الدم! فبمجرد ما بيبطلوا الدواء، النزيف بيقف، والكل يفتكر إن "بركة" راسبوتين هي السبب.

"نظرة العين" المرعبة 👁️

كل اللي قابله وصفوا عينيه بإنها كانت بتبرق بنور غريب ومحدش بيقدر يثبت عينه في عينه. راسبوتين كان بيتدرب على تثبيت حدقة العين لفترات طويلة عشان يوتر اللي قدامه ويحسسه إنه "مكشوف" أو إن راسبوتين بيقرأ أفكاره، وده خلى النبلاء والستات في القصر يسلمو ليه بمنتهى السهولة.

 خدعة "الرسائل الغيبية"

كان بيخلي أتباعه يجمعوا له معلومات دقيقة جداً عن حياة النبلاء والوزراء (فضايحهم، مشاكلهم الصحية، ديونهم). ولما يقابل حد منهم لأول مرة، يقول له: "أنا شفت في رؤية إنك بتعاني من كذا وكذا.." فالشخص يتصدم ويفتكر إن راسبوتين "مكشوف عنه الحجاب"، ويبدأ يسمع كلامه في كل حاجة.

"تنبؤات" الموت والخراب

كان دايماً بيلعب على وتر الخوف. كان يقول للملكة: "لو أنا مش موجود، ابنك هيموت في خلال 24 ساعة". ولما بدأت الحرب العالمية، كان بيقول لها: "أنا شفت في منامي إن النصر مش هيتحقق إلا لو عملتم كذا..". وبما إن الملكة كانت ست بتصدقه جداً وبتخاف على ابنها، كانت بتنفذ كل أوامره وهي مغمضة.

خدعة "القداسة والخطية

كان عنده فلسفة غريبة جداً بيقنع بيها الستات في القصر، كان بيقول لهم: "عشان ربنا يغفر لك، لازم تغلطي الأول وتندمي، وأنا هنا عشان أساعدك تغلطي وتتوبي!". الخدعة دي خلت له جيش من الستات الأرستقراطيات بيدافعوا عنه قدام القيصر ضد أي حد يحاول يطرده.

(ألاعيب الرهيب)

راسبوتين مكنش بس بيستخدم البخور والصلوات، ده كان 'ساحر نفسي' من الطراز الأول. كان بيعرف إزاي يسيطر على المريض بنبرة صوته، وإزاي يجمع 'معلومات سرية' عن أعدائه ويواجههم بيها كأنها وحي من السما، لدرجة إن القيصر نفسه كان بيخاف من نظرة عينيه اللي كانت بتحسسه أنه كتاب مفتوح قدامه .

اقرأ أيضاً : مفاهيم يخلط بينها الناس… القرين – المسّ – الجنّ العاشق | الفهم الصحيح الذي يغيّر نظرتك للأمر بالكامل

بعض النبلاء استشعرو بالخطر وضرورة التخلص منه"

ليه قرروا يقتلوه؟: النبلاء والوزراء حسوا إن "الفلاح القذر" ده بيدمر سمعة العرش الروسي، وانتشرت إشاعات إنه جاسوس لألمانيا وقت الحرب العالمية الأولى، فقرروا يخلصوا منه عشان ينقذوا هيبة الإمبراطورية اللي كانت بتنهار بسببه.

النهاية الأسطورية: في ليلة قتله سنة 1916، قدموا له كعك وخمر مسموم بـ "السيانيد" ومماتش (يقال إن السكر أفسد مفعول السم)، ضربوه بالرصاص في ظهره وقام هجم عليهم وحاول يخنقهم! في الآخر قيدوه ورموه في النهر، ولما الجثة طلعت اكتشفوا وجود مية في الرئة، يعني فضل "يتنفس" ويحاول يفك قيوده تحت المية المتجمدة رغم السم والرصاص!

. أليستر كراولي:

إدوارد أليستر كراولي، بريطاني، اتولد سنة 1875 لعائلة غنية جداً ومتدينة، لكنه تمرد عليهم وسلك طريق "العلوم السرية".

بداية السحر والسيطرة: كراولي مكنش مجرد دجال، ده كان دارس للكيمياء وعلوم النفس. سافر العالم كله (الهند، المكسيك، مصر) عشان يتعلم طقوس السحر الأسود. في مصر سنة 1904، ادعى إن "شيطان" أو كيان من عالم تاني اسمه "آيواس" أملى عليه (كتاب القانون) في ليلة غامضة داخل الهرم الأكبر، الكتاب ده بقى هو "دستور" السحرة في العصر الحديث.

ليه الناس خافت منه؟: كان بيعمل طقوس غريبة وصادمة للمجتمع، وأطلق على نفسه لقب "الوحش 666". الصحافة البريطانية سمته "أشر رجل في التاريخ" بسبب أفكاره اللي بتدعو للتحرر المطلق من أي أخلاق أو دين.

لغز "الهرم الأكبر" وكتاب القانون (1904)

دي كانت أخطر محطة في حياته، وحصلت هنا في مصر. كراولي ادعى إنه قضى ليلة داخل غرفة الملك في الهرم الأكبر، وهناك ظهر له كيان غامض اسمه "آيواس" (Aiwass).

ادعى إن الكيان ده أملى عليه "كتاب القانون" (The Book of the Law). الكتاب ده مش مجرد ورق، ده دستور كامل بيدعو لهدم كل الأديان والأخلاق، وشعاره الشهير: "افعل ما شئت.. هذا هو كل القانون".

الكتاب ده بقى المرجع الأساسي لكل جماعات السحر الأسود وعبدة الشيطان في العصر الحديث.

تأسيس "ثيليما" (الدين المظلم)

كراولي مكنش عايز يبقى ساحر وبس، هو كان عايز يبقى"نبي" لدين جديد اسمه ثيليما.
راح عامل ايه بنى معبد في صقلية (إيطاليا) سماه "دير ثيليما"، وكان بيجمع فيه أتباعه لعمل طقوس غريبة جداً وصادمة للقيم الإنسانية، لدرجة إن الحكومة الإيطالية طردته من البلد بسبب التقارير المرعبة اللي طلعت عن اللي بيحصل جوه المعبد ده.

سحر "التواصل مع الكيانات" (فتح البوابات)

من أخطر أعماله اللي لسه بتثير الرعب هي محاولاته لـ "فتح بوابات" بين عالمنا وعوالم تانية.
 قام بسلسلة طقوس في أمريكا ادعى فيها إنه فتح ثغرة في جدار الكون وقدر يتواصل مع كائن اسمه "لام" (Lam). الصادم إن كراولي رسم الكائن ده سنة 1918، وصورته بتشبه جداً "الكائنات الفضائية" (الرماديين) اللي بدأت تظهر في أفلام السينما بعد كدة ب30 سنة!

"السحر الجنسي" والسيطرة النفسية

كراولي كان أستاذ في استخدام علم النفس مع السحر. كان بيستخدم طقوس محرمة ومقززة عشان يكسر "الحواجز النفسية" عند أتباعه، وبكده يضمن ولاءهم التام ليه كأنهم "عبيد" لإشارته.

التلاعب بالرموز (الوحش 666)

عشان يزود حالة الرعب حواليه، أطلق على نفسه لقب "الوحش 666"            (The Beast 666)، وهو رمز "الشيطان" في الكتب القديمة. كان بيتعمد يظهر في الصور بنظرات حادة وحركات إيد غريبة عشان يرهب أعداءه ويوهمهم إنه بيمتلك قوى تدميرية.
كراولي مكنش مجرد ساحر بيطلع أرانب من الطاقية، ده كان بيسافر من بلد لبلد عشان 'يفتح بوابات' لعوالم مجهولة. أخطر أعماله حصلت في قلب القاهرة، لما ادعى إن شيطان أملى عليه كتاب بيدعو لخراب الأخلاق.. ومن يومها وصورته مرسومة في خيال الناس أنه اكتر شر  عاش على الأرض.

وصلنا للشخصية النسائية الوحيدة في قائمتنا، والست دي مكنتش مجرد "دجالة" عادية، دي قدرت تخدع النخبة والعلماء في أوروبا وأمريكا بذكاء منقطع النظير.. هيلين بلافاتسكي

هيلين بلافاتسكي: "المرأة التي سحرت عقول العلماء"

روسية الأصل، اتولدت سنة 1831 لعائلة أرستقراطية غنية جداً. لكن هيلين مكنتش بتاعة قصور وحفلات، دي هربت من جوزها وهي عندها 17 سنة بس، وبدأت رحلة "لف عالم" استمرت 20 سنة، من أمريكا للهند لحد ما ادعت إنها دخلت "التبت".

التبت هي دولة سابقة في آسيا الوسطي 

بداية السحر وأخطر أعمالها (خدعة الرسائل والورد):

هيلين كانت أستاذة في "العروض المسرحية" اللي بتسميها سحر. أسست "الجمعية الثيوصوفية" وبدأت تبهر الناس بحاجات مكنش لها تفسير وقتها:

اقرأ أيضاً : من هو أول من بكى في السماء؟ قصة أول دمعة غيّرت مصير البشرية

كانت تقعد مع الناس وفجأة تقع "رسالة" من السقف! الرسائل دي كانت مكتوبة بخط غريب وبتقول إنها جاية من "أسياد الحكمة" في التبت عشان يوجهوا البشرية.

تجسيد الأشياء: كانت بتغمض عينيها وتخلي ورد "يظهر" من العدم في إيد الحاضرين، أو تخلي أصوات أجراس ترن في الهوا وهي واقفة مكانها.

ادعت إنها بتقدر تقرأ الكتب وهي مقفولة وتعرف أسرار الناس من مجرد نظرة، وده خلى مئات العلماء والنبلاء يمشوا وراها كأنهم منومين مغناطيسياً

ليه حصل معاها كدة؟ (كشف الخدعة):

المركب مشيت لحد ما "جمعية الأبحاث النفسية" في لندن بعتت محقق اسمه "ريتشارد هودجسون" عشان يدرس حالتها. المحقق ده فجر قنبلة لما اكتشف إن أوضتها فيها "فتحات سرية" ودواليب مزدوجة هي اللي بتنزل منها الرسائل، وإن الورد والأجراس كانت حيل ميكانيكية متطورة جداً. العالم كله انقلب عليها واتهموها بإنها "أكبر نصابة في القرن الـ 19".

نهايتها:

رغم الفضيحة، هيلين مفقدتش أتباعها بالكامل، وفضلت تكتب كتب ضخمة ومؤثرة جداً زي (العقيدة السرية) لحد ما ماتت في لندن سنة 1891 وهي قاعدة على مكتبها. ورغم إن العلم كشف خدعها، إلا إنها لسه بتعتبر "الأم الروحية" لكل علوم الطاقة واليوجا والروحانيات اللي بنشوفها النهاردة في الغرب.

إدوارد كيلي: "المزور الذي فتح باب السماء"

إنجليزي الجنسية، عاش في القرن الـ 16. كيلي كان راجل "سوابق" بالمعني الحرفي السلطات في إنجلترا قطعت ودانه كعقاب ليه على "تزوير" صكوك وعقود، وعشان يداري الفضيحة دي كان دايماً بيلبس غطاء راس طويل يداري ودانه المقطوعة.

بداية السحر وأخطر أعماله (لغة الملائكة والذهب):

كيلي كان ذكي جداً، قدر يقنع "جون دي" (أكبر عالم ومستشار الملكة إليزابيث) إنه "وسيط روحاني" ملوش مثيل.

قعد قدام بلورة سحرية وادعى إنه شايف ملائكة بيكلموه بـ "لغة سماوية". بدأ يملي على العالم "جون دي" أبجدية كاملة وقواعد ونصوص باللغة دي. الغريب إن اللغة دي كانت منظمة جداً لدرجة خلت جون دي يصدق إنها فعلاً من السما!

تحويل التراب لذهب: دي كانت الخدعة الكبرى. ادعى إنه لقى "مسحوق أحمر" غامض هو ده "حجر الفلاسفة" اللي بيحول المعادن الرخيصة لذهب خالص. وبدأ يعمل تجارب كيميائية قدام الناس ويبهرهم بظهور لمعة الذهب في الأواني.

ليه نهايتها كانت مأساوية؟:

سمعته وصلت لإمبراطور النمسا "رودولف الثاني"، اللي كان مهووس بالكيمياء والذهب. الإمبراطور استدعاه واداله لقب "فارس" وطلب منه يصنع له أطنان من الذهب. طبعاً كيلي بدأ يماطل ويخترع حجج، فالإمبراطور فقد أعصابه وحبسه في قلعة قوية وقاله: "مش هتخرج من هنا إلا والدهب معاك.

كيلي حس إن رقبته هتطير، فقرر يهرب من شباك القلعة العالي جداً باستخدام حبل صنعه من ملايات السرير. ولسوء حظه، الحبل اتقطع وهو في الهوا، ووقع وقعة مروعة كسرت رجله وجسمه، ومات متأثراً بجراحه سنة 1597، عشان تنتهي قصة الرجل اللي "زور" لغة السما وطمع في دهب الأرض!

في النهاية، الشخصيات دي مكنتش مجرد أسماء في كتب التاريخ، دول كانوا 'ظواهر' حيرت العقول. سواء كانوا سحرة بجد وقدروا يفتحوا بوابات لعوالم تانية، أو كانوا عباقرة في النصب والتلاعب النفسي وقدروا يضحكوا على ملوك وأباطرة.. الحقيقة الأكيدة إنهم سابوا بصمة مرعبة ومستحيلة التفسير لحد النهاردة.

العلم قدر يكشف خدع 'هيلين بلافاتسكي'، والسياسة كشفت طمع 'إدوارد كيلي'.. لكن لسه سر 'راسبوتين' اللي رفض الموت، و'لغة الملائكة' اللي ملهاش مثيل، وكتاب 'أليستر كراولي' المظلم، ألغاز بتطاردنا وبتقول لنا إن العالم ده فيه أسرار أكبر بكتير من اللي بنشوفه بعنينا.

سؤالي ليكم النهاردة:

لو الزمن رجع بيكم، هل كنتوا هتصدقوا الناس دي وتمشوا وراهم؟ ولا كنتم هتشوفوا الخيط الرفيع اللي بيفصل بين 'المعجزة' وبين 'الخدعة'؟

شاركونا برأيكم في التعليقات